Rezime uityèm de final yo !

Nou te asiste a yon uityèm de final anraje, chaje ak bèl match e jan nou konnen Koup Dimond lan ye ane sa, li te chaje ak sipriz tou. Uityèm de final yo te sitou make pa eliminasyon ekip Ajantin nan, ekip Pòtigal la e ekip Lespay la.

Lafrans 4-3 Ajantin 

Nou te kòmanse ak yon gran chòk, Ble yo fas a Albiseleste a. Tout moun t’ap ret tann yon revèy de de ekip sa yo. Byen ke Lafrans li menm te fini premye nan gwoup li a li pa’t epanye de kritik medya yo e de fàn li yo. Match sa te reponn a atant tout moun pou nivo fòtbòl ki te gen ladan, men moun sipòtè Ajantin yo ta tann plis la, Lionel Messi, pa’t vrèman make prezans li. Ajantin te gen yon lòt vizaj, ou ta di li te rejwenn fòtbòl li, men fransè yo te a yon gran nivo, se te yon Lafrans nan gran jou li. N’ap sinyale gwo pèfòmans Kylian Mbappé ke ajanten yo pa’t ka kenbe, double pou prodij fransè a. Avèk mannyè, Lafrans te genyen dyèl sa a (4-3).

Irigwe 2-1 Pòtigal 
Se te yon match ki te trè ouvè, chak ekip yo te gen moman pa yo ladan. Gras a yon gran Edison Cavani ki te make yon double, Irigwe rache biyè kalifikasyon’l nan men pòtigè yo. A remake, se pa’t yon gran Cristiano Ronaldo nan jou sa a, nou pa’t ase wè prezans li nan match la. Nan fen match la, li te depase pa eliminasyon an li te wè pwòch, li ta pral resevwa yon katon jòn aprè yon altèkasyon li gen ak abit la. Yon ti parantèz, Cr7 sanble sou kite kapital espanyòl la pou pran direksyon Turin.

 Lespay 1-1 Larisi

Nou te vle wè si peyi òganizatè a ta ka sove poul li anba gwo ekip espanyòl la. Se te yon ekip Lespay ki t’ap miltipliye pas, jan yo ye abityèlman, e ris yo yo menm te poste an blòk pou defann yo. Lespay te mennen aprè yon otogòl, Larisi te egalize gras a A. Dziouba sou yon penalite. Match la te rete konsa jiska 120 minit. Gwo sipriz, Larisi ta pral genyen seyans penalite a (3-4) e elimine ekip Lespay la.

Kowasi 1-1 Dànmak 
Match sa a te eksepsyonèl de komansman jiska la fen. Depi nan (4′) match la te gentan (1-1), Dànmak te ouvri skò a la (2′) e Kowasi te egalize de minit aprè, se te fou. Men, skò a ta pral depase 90 minit tan reglèmante yo, depase 30 minit tan pwolongasyon e rive nan seyans penalite. La a se ta pral yon gran dyèl ant Schmeichel e Subasic. De gadyen yo te debòde, yo tou de t’ap kenbe penal pou advèsè yo. Subasic te sòti venkè, ekip Kowat la te genyen se seyans penalite a (3-2).

Brezil 2-0 Meksik
Yon lòt match ke anpil moun t’ap tann tou. Menm jan ak ekip Lafrans lan, Brezil te fini premye nan gwoup li a, se vre, men li potko konvenk vrèman fàn li yo. Ebyen nan match sa a, nou ta pral wè yon gran Brezil. Neymar ke anpil moun t’ap kritike, pou jan li t’ap plede met jwèt Brezil anreta, ta pral dechennen nan match sa a e pèmèt a selesao  a jwenn kalifikasyon’l pou 1/4 de final yo. Yon gòl e yon pas desizif pou vedèt brezilyen an. Akote de tout sa, Neymar pa’t bliye fè ti spektak li yo. Meksik te alawotè de match la, yo te jwenn plizyè okazyon pou yo te make, men malerezman pou Aztèk yo sa pa’t rive fèt!

Bèljik 3-2 Japon 
Se te yon lòt match ki te vrèman alawotè de yon Koup Dimond, yon match vrèman fou. Nan premye mitan match la tou de ekip yo t’ap atake. Nou te sezi wè fason japonè yo te abòde match la, yo pa’t pè Dyab Rouj yo menm. Mitan sa a te fini (0-0). Retounen sou teren, se la a ki ta pral gen sezisman an. Ekip Japon an ta pral ouvri skò byen rapid e kèk minit aprè ta pral mennen (2-0). Tout moun te gentan wè ekip Bèljik la k’ap pran direksyon Briksèl. Men se potko lè a, Bèljik ta pral fè remontada a e batJapon nan tan adisyonèl, swa nan (93′). Se te yon desepsyon pou japonè yo aprè tout efò ke yo te fin fè.

Swèd 1-0 Swis
Se te yon match mwayen, yon lòt fwa nou te ka apresye regwoupman defansif swedwa yo. Match la te ase ouvè, aksyon t’ap vini bò kot tou de ekip yo. Ekip Swèd la ki te gen plis chans sou kou yo, te rive konkretize youn nan aksyon’l yo e make yon grenn gòl ki ta pral sinonim de kalifikasyon’l pou kare 8 la. Echèk pou ekip Swis la!

Kolonbi 1-1 Angletè 
Nou ka kòmanse pou di ke se match ki te gate gou uityèm de final yo. Nou te atann a yon bèl spektak fòtbòl, men sa pa’t la. Match la te sibi anpil arè akoz de altèkasyon ki te plede genyen ant jwe de ekip yo. Harry Kane te jwenn ouvèti skò pou anglè yo sou penalite. Aksyon ki te plis make match sa a, se egalizasyon ekip Kolonbi a nan tan adisyonèl gras a Yerry Mina, nouvo defansè ekip Baselòn nan. Se ta pral twazyèm match nan uityèm de final yo ki ta pral rive nan penalite. Tout moun te wè ke Kolonbi te merite kalifye, men anglè yo te genyen seyans penalite a (3-4).

Afich 1/4 de final yo:

Vandredi 6 jiyè
10:00 nan maten : Lafrans – Irigwe
2:00 nan aprèmide : Brezil – Bèljik
Samdi 7 jiyè
10:00 nan maten : Swèd – Angletè
2:00 nan aprèmidi : Larisi – Kowasi

Sous imaj yo: sudouest.fr ; sasportsblog.com ; eurosport1.fr ; footemto.com ; ici.fr

An’n ale pou uityèm de final Koup Dimond lan.

Aprè de semèn faz de poul yo, de semèn bon boul ki te sitou make ak anpil sipriz, Mondyal la pral kontinye ak mwatye nan ekip ki t’ap patisipe yo. Wi, sa nou panse a se sa, Koup Dimond la rive nan faz eliminasyon dirèk yo. 16 ekip deja fè yon kraze kite sa, pami yo, tout ekip ki te reprezante kontinan afrik la, ladan yo tou gen ekip nou pa’t janm panse ki t’ap ale granm maten sa, la a n’ap pale de chanpyon dimond 2014 yo, Almay epi ekip Polòy nan.

Gen ekip ki rive nan kare sa a sou gwo presyon, nou ka menm di pa mirak. Pami yo, nou ka site Ajantin, Lespay, Pòtigal ak Japon.
Ajantin ki te gen 1 pwen sou 6 sou de premye jounen yo, pou li te kalifye, te nan obligasyon pou li bat Nijerya nan dènye jounen an e espere yon defèt oubyen yon match nil de Island. Gras a Lionel Messi e Marcos Rojo ki ta pral make nan dènye minit yo (86′), Ajantin jwenn kalifikasyon’l sou ekip Nijerya a.
Lespay ak Pòtigal se te lidè Gwoup B a, yo te gen menm valè pwen. Yo tou de te bezwen yon viktwa oubyen yon match nil pou asire kalifikasyon yo. Yo te jwenn li vre, men se te sou gwo presyon. Lespay ki t’ap jwe ak Mawòk te nan gwo difikilte fas a mawoken yo ki te deja elimine, men ki te vle sove lonè. Nan dènye minit, Espay fè 2-2 ak Mawòk.
Pòtigal tou te sou gwo presyon fas a ekip Iran an ki li menm te bezwen yon viktwa pou li kalifye. Iranyen yo te gen match la nan men yo, men yo pa’t rive bat. Match sa a te fini yon gòl nan chak kan.
Japon li menm te gen menm pwen, menm diferans gòl, li te make menm valè gòl ak Senegal, men pou fair play, sa vle di pou mwens katon jòn ke li resevwa pa rapò a ekip Senegal la fè li kalifye.
Gen lòt ekip toujou ki etone moun pou prezans yo nan uityèm de final la. Men sa ki enpòtan, se ke bèl avanti Koup Dimond lan ap kontinye pou yo.

Ekip ki kalifye nan chak gwoup yo:
Gwoup A: Irigwe, Larisi. Gwoup B: Espay, Pòtigal. Gwoup C: Lafrans, Dànmak. Gwoup D: Kowasi, Ajantin. Gwoup E: Brezil, Swis. Gwoup F: Swèd, Meksik. Gwoup G: Bèljik, Angletè. Gwoup H: Kolonbi, Japon.
Afich uityèm de final yo
Samdi 30 jen
10:00 nan maten : Lafrans – Ajantin
2:00 nan aprèmidi : Irigwe – Pòtigal
Dimanch 1e jiyè
10:00 nan maten : Lespay – Larisi
2:00 nan aprèmidi : Kowasi – Dànmak
Lendi 2 jiyè
10:00 nan maten : Brezil – Meksik
2:00 nan aprèmidi : Bèljik – Japon
Madi 3 jiyè
10:00 nan maten : Swèd – Swis
2:00 nan aprèmidi : Kolonbi – Angletè
Sous imaj la: lefigaro.fr

Faz eliminasyon dirèk yo pral jwe ak yon lòt balon.

Larisi 2018 se Koup Dimond ki gen plis envestisman an tèm de lajan nan istwa Koup Dimond. Sa pa rete la, yon lòt bèl e gwo koze nan Mondyal sa a, faz eliminasyon dirèk yo pral jwe ak yon lòt balon.
Tetstar 18 se balon ofisyèl Koup Dimond lan, se avè’l Yuri Gazinskiy te ouvè kontè gòl Mondyal la, se avè’l Messi te make 100èm gòl Mondyal la yè, sa se te jis pou listwa. Ebyen, pou rès Koup Dimond lan, pi presizeman, dezyèm tou a, li pap jwe ak balon sa a.
Yè, Adidas devwale balon ofisyèl tou eliminasyon dirèk la, Telstar Meyta. Nan lang ris, mo Meyta a vle di “anbisyon”, “rèv”. Moun yo ki fè konsepsyon balon sa a fè’l nan lide de itansite ki pral genyen nan match yo pou kalifikasyon chak ekip. Telstar Meyta se li ki pral woule sou teren apati samdi si Dye ve pou rive nan final.

Sous imaj la: fifa.com

Udpate Mondyal Paw sou Google Play Store lan !

Al update Mondyal Paw sou Google Play Store lan ! Nouvel vèsyon app lan disponib kounyen an sou lyen sa !

1) Nou amelyore notifikasyon yo : yo pi long pou na ka baw plis detay sou match yo + nou ka voye imaj tou.

2) Ou ka pataje app lan fasil ak zanmiw : nou ajoute yon bouton “Pataje” nan menu an.

3) Nou korije kèk bug e nou amelyore app lan tou.

Senaryo pou dènye jounen faz de gwoup yo.

Gwoup B

Pwochen match: Iran-Pòtigal /  Espay-Mawòk

Espay ak Pòtigal gen menm pwen, si yo bat oubyen yo fè yon match nil, y’ap kalifye. Men si yo tou lè de ta pèdi, sa ki pèdi sou pi gwo skò a, se li k’ap elimine.
Iran pou li kalifye fòk li bat Pòtigal, oubyen fè yon match nil men fòk li ta espere Espay pèdi sou yon diferans gòl -2. Si li bat Pòtigal e Espay ta pèdi l’ap fini premye nan gwoup la.
Mawòk nenpòt rezilta li fè, l’ap toujou elimine.

Gwoup C

Pwochen match yo: Ostrali-Pewou / Dànmak-Frans

Lafrans kalifye deja, li pral jwe ak Dànmak. Si li bat oubyen fè yon nil l’ap fini premye nan gwoup la, men si pèdi, l’ap dezyèm.
Dànmak, yon viktwa oubyen yon match nil ap kalifye’l. Men si li pèdi e Ostrali ta bat Pewou ak yon diferans gòl +3, l’ap elimine.
Ostrali nan obligasyon pou li bat, si li vle kalifye. Fòk li ta bat sou skò diferans +3 e fòk Dànmak ta pèdi.
Pewou li menm, de tout lè mannyè l’ap elimine.

Gwoup D

Pwochen match yo: Nijerya-Ajantin / Island-Kowasi

Kowasi ak 6 pwen li an, nenpòt rezilta li ta fè, l’ap kalifye kanmèm. Li ka pèdi premye plas li a, si toutfwa li ta pèdi e Nijerya ta bat ak yon diferans gòl +5.
Nijerya, pou li kalifye fòk li bat Ajantin. Oubyen fè yon match nil men fòk Island pa ta bat Kowasi sou yon skò diferans +3.
Island, pou li kalifye fòk li bat Kowasi sou yon skò diferans +3 e espere yon defèt oubyen yon match nil de Nijerya.
Ajantin pou li kalifye se bat pou li bat Nijerya e espere yon defèt oubyen yon match nil de Island pou evite tout lòt senaryo. Paske si Island ta bat ak yon skò omwen +2 e Ajantin li menm, ta bat ak yon skò ki pi ba ke +3, l’ap elimine.

Gwoup E

Pwochen match yo: Sèbi-Brezil / Swis-Kostarika

Brezil pral jwe ak Sèbi, yon viktwa ap kalifye’l. L’ap fini dezyèm si:
+li fè match nil e Swis ta bat Kostarika
+Swis fè yon viktwa ki nètman siperyè pa rapo a viktwa pa’l la.
Men si li ta pèdi e Swis bat, l’ap elimine.
Swis, yon viktwa oubyen yon match nil ap kalifye’l. Si li pèdi e Brezil bat l’ap kalifye kanmèm. Men si li pèdi sou yon diferans gòl -2 e Sèbi ta bat oubyen fè yon match nil ak Brezil l’ap elimine.
Sèbi, pou li kalifye l’ap bezwen yon viktwa. Li ka kalifye ak yon match nil, si Swis ta pèdi sou yon skò diferans -2.
Kostarika, nenpòt rezilta li fè l’ap elimine kanmèm.

Gwoup F
Pwochen match yo: Koredisid-Almay / Meksik-Swèd

Meksik, malgre 6 pwen li an, li poko asire de kalifikasyon’l. Si Swèd ta bat li ak yon skò diferans +3 e Almay ta bat match pa’l la sou menm diferans gòl sa a, Meksik ap elimine. Apre sa, yon viktwa oubyen yon match nil ap kalifye’l.
Almay depi li ta bat ak yon skò pou piti diferans +3, li pa bezwen enkyete’l de rezilta match Meksik-Swèd la. Match nil ap bon pou li, si Swèd ta pèdi. Si Almay fè match nil e Swèd ta fè match nil tou, Almay ap kalifye si sèlman match nil pa’l la egal oswa siperyè a match nil Swèd la (egz: Almay ta fè 1-1 e Swèd fè 1-1, Almay kalifye). Si Swèd fè 1-1 e Almay fè 0-0, Almay elimine e Swèd kalifye paske Swèd ta make plis gòl.
Swèd, l’ap kalifye si li bat Meksik sou yon skò ki siperyè a Almay an ka de yon viktwa de Almay tou. E si li ta fè match nil, fòk Almay ta pèdi pou li ka kalifye.
Koredisid ak 0 pwen li an ka kalifye, si li bat Almay ak yon gran diferans gòl e ke Swèd  ta fè yon gwo defèt fas a Meksik.

Gwoup G
Pwochen match yo: Panama-Tinizi / Angletè-Meksik

Angletè ak Bèljik, yo tou lè de kalifye deja, nenpòt rezilta ki tonbe antre yo pap deranje anyen. Y’ap jwe sèlman pou konn sa k’ap premye nan gwoup la.
Tinizi ak Panama pa gen okenn chans pou yo ankò, yo elimine deja.

Gwoup H
Pwochen match yo: Japon-Polòy / Senegal-Kolonbi

Japon ak Senegal, yon viktwa oubyen nenpòt match nil ap kalifye yo.
Kolonbi, pou li kalifye, li nan obligasyon pou li bat Senegal. Men si li fè yon match nil e Japon ta pèdi l’ap kalifye tou.
Polòy, viktwa, match nil, anyen pap kalifye’l.

Coutinho ak Neymar reveye Brezil.

Ekip Brezil la ki te rantre ak yon match nil nan Mondyal la, fas a ekip Swis la, jwenn yon souf jodi a aprè vitwa yo 2-0 sou ekip Kostarika a.

Yon kòmansman match ki te enkyetan pou selesao a, yo t’ap pèdi nan jwèt yo e yo pa’t ase konvenkan nan inisyativ yo t’ap pran. Nou te gen enpresyon ke se menm Brezil ki te devan Swis la. Men retounen de vestyè a, ekip Brezil la te vin tou anflame. Brezilyen yo t’ap miltipliye pas, atake pa tout mwayen, men Kostarika te byen ap defann li an blòk. Sa rive jis nan tan adisyonèl yo kote Coutinho ta pral pwofite de yon balon ke yon defansè kostariken pèdi pou li ouvri skò a. Senk minit aprè, Neymar ke tout moun t’ap tann, ta pral sele vitwa a pou ekip brezilyèn nan.

Difisil ke li te ye, ekip Brezil la  relanse !

Sous imaj la: beut7.com

Ajantin trè pwòch de yon eliminasyon!

Aprè match Ajantin-Island lan, nou te konstate feblès seleksyon ajantin nan, absans Messi nan jwèt la. Fas a Kowasi, tout moun t’ap ret tann yon revèy de ekip Ajantin nan, yon retou de Lionel Messi, men fas a kowat yo albiseleste a efondre.
Move chwa de seleksyonè a, Jorge Sampaoli, je san konviksyon, san motivasyon se sa ki karakterize fòmasyon ajantin nan e sa koute yo trè chè. Nan 15 premye minit yo nan match la, ou te ka di ke sa ta prale mye pou ajantin, men aprè yo te jis la kòm spektatè de jwèt kowat yo. Premye mitan an te fini (0-0). Nan dezyèm mitan an, Kowasi ta pral ofri Ajantin yon leson foutbòl.
Pa yon erè de Willy Caballero sou yon relans li t’ap fè bay piyay a Ante Rebić ki pa’t ezite ouvri vàn nan. Aprè gòl sa, ou te ka wè yon dezolasyon sou vizaj ajanten yo. Pa’t gen okenn reyaksyon bò kote ekip Ajantin nan, sa ki ta pral lese Kowasi ouvri kò li nèt. Lucas Modric sou yon bèl frap ta pral senyen ajantin ankò. Nan fen match (90+1), Ivan Rakitic ta pral retire tout espwa ajanten yo. 3-0 pou ekip Kowasi a, manje a kwit!
Kowasi a asire biyè’l pou 1/8 de final yo, pou albiseleste a defèt sa a mete yo nan yon trè move pozisyon. Kalifikasyon yo pral jwe jis nan dènye jounen faz de poul yo, men desten yo pa fin nan men yo nèt.
Kesyon k’ap poze se, kisa k’ap pase Messi lè l’ap jwe pou ajantin?

Sous imaj la: senegal7.com

Irigwe, Pòtigal, Espay, yon seri 1-0.

El Pistolero, reponn prezan.Pou santyèm match Luis Suarez ak ekip irigweyèn nan, li ofri yon vitwa a seleste a. Gras a kout vitwa (1-0) sa yo fè fas a ekip Arabisaoudit la, yo tou asire biyè yo pou 1/8 de final. Nan dènye jounen faz de poul yo, Irigwe pral gen pou’l jwe ak Larisi pou konn ki ekip k’ap premye nan Gwoup A a.

Pou yon lòt fwa Cristiano an mòd sovè pou ekip Pòtigal la.Cristiano ki te make twa gòl e rache yon nil pou ekip Pòtigal la fas a ekip Espay la, yon lòt fwa ankò desizif pou ekip li. Fas a Mawòk, Cr7 frape depi nan (4′) sou yon bèl kout tèt. Gòl ki mete Cristiano pou kont li nan tèt klasman bitè yo ak 4 gòl e ki pèmèt Pòtigal bat mawoken yo (1-0).

Pou yon lòt fwa, mawoken yo jwe yon bèl match, menm domine advèsè yo, men yo pa rive fè siksè. Domaj pou lyon atlas yo, yo elimine swit a dezyèm defèt sa.

 

Difisilman Espay bat Iran 1-0.

Ekip Espay la te gen obligasyon pou’l bat dezyèm match sa a, aprè nil 3-3 yo te fè ak ekip Pòtigal la. Difisilman yo bat Iran yon grenn gòl a zero, gras a Diego Costa ki te chanse sou yon balon ke yon defansè iranyen ta pral degaje ki kontre nan pye’l.
Iran te defonse’l pandan tout match la, men sa pa’t pote gran bagay pou yo. Sa pa’t fasil pou Roja a, men yo fè esansyèl la.

Malgre retou Mohamed Salah, Ejip pa rive bat.

Nan premye sòti farawon yo, yo te malchanse fas a ekip irigweyèn nan ki te bat yo (1-0) nan fen match.

Yè, malgre retou Mo Salah a, ekip Ejip la pa rive bat ekip ris la ki fin dechennen nan Mondyal la. Ejip pèdi 3 gòl a 1. Salah te make grenn gòl Ejip la sou penalite, men li pa’t sifi koz Larisi te gentan ap mennen (3-0) sou yo. Dezyèm defèt sa a sinonim eliminasyon farawon yo nan konpetisyon an.

Te gen plizyè erè abitraj nan match la ki te an favè ris yo, men nou ka apresye bèl pèfòmans yo tou. Larisi pran direksyon dezyèm tou, Ejip pran direksyon lakay li.

Sous imaj la: bonjourdakar.com